"Kud hi jata hoon, iss zillat bhari zindgi ko yahi khatam kar deta hoon" - Ganga barage pe har baar cycle chalate chalate yeh aatmghati khyal baar baar zehan main aata tha Beant ke.
Umar kacchi thi, shayad nasamjhi thi. 17-18 saal ki umar ka grameen kshetra ka ladka jisse duniyadari ki samajh hi na thi, nahi pata tha ki apne kahlane wale log bhi usse ghrina aur giri nazron se hi dekhte the. Mata-Pita ne apni haisiyat ke hisaab se acchi shiksha di, sabhi bado ka aadar aur satkar karna sikhaya, sabhi choto ko prem karna shikhaya. Par shayad duniyadari ka paath padhana bhul gaye. Shayad unhe bhi nahi pata raha hoga kyonki woh to sabhi ke baccho ko apna baccha samajhte the par yeh kabhi nahi socha hoga ki baki log unke bacche ko apna baccha nahi apne liye naukar hi samjhate the.
Naam Beant rakha tha bade pyar se, "Beant - Jiska Koi Anth Nahi". Aaj woh bhi apna anth karne ki ichha liye baar baar bhatak raha tha sadko pe. Iska kaaran bhi shayad woh khud hi tha, aage padhne ki chaah liye woh bade sahar main to chala aaya par acchi padhai ke liye pratiyogita deni hogi, uske liye alag alag tarah ki taiyariyon ki jarurat hogi, yeh to usse kisi ne na bataya aur na uski nasamajh dimaag main aaya.
3 saal ki taiyari ke baad bhi 27 baar pratiyogitaon main asafal hone ki hatasha wahi akele samajh sakta tha. Aisa nahi tha ki gyan kam tha, vishay ke upar pakad thi, par shayad bachpan se 3 ghante main 10-15 sawal hal karke pass hone wale ko 3 saal main yeh nahi samajh aaya ki 2 ghante main 120 sawal kaise hal honge. Hindi bhasha main sawalon ko padhke jisse 10 minute lagte ho samjhane ko usse bhala pratiyogita main angrezi main pucche sawal 1 minute se bhi kam main kaise samajh main aayenge.
Gharwalon ne padhne to bhej diya par shayad margdarshan karna bhul gaye, unhe bhi kahan pata raha hoga, kewal itna suna hoga ki Pratiyogita bahut kathin hoti hai. Upar se bhasha ka gyan, ta-umar hindi medium se padne wala ek ausat darze ka vidhyarthi kahan janta tha ki pratiyogi parikshaon main angrezi bhasha ka gyan hona bhi aavashyak hai.
Shayad kami kahin rah gayi hogi usse mehnat karne main ya shayad samay ke saath mehnat karne ka hausla bhi tut gaya hoga. Sabne kewal parinam dekha aur dosharopan kiya, kisi ne koshish na dekhi aur nahi koshish main rah gayi kamiyon ko dur karne ka rasta bataya. Rishtedaron ne shabdo ke jo baan chhode unse bacha khucha hausla bhi tut gaya hoga. Apno ne bhi koi bachav nahi kiya shayad unki jimmedariyon ka bojh jyada raha hoga ya shayad unhe bhi laga hoga yeh wakai main kisi layak nahi hai.
Ashant man ke issi "Anterdwand" se jujhta hua Beant aaj bhi nirasha ke bhaav liye ghar ki taraf chal pada, shayad abhi bhi kuch aash bachi thi kisi ki ummedon ki "Thapki" apne kandho pe mahsoos karne ki.
